Месяцеслов
7 декабря · по старому стилюНеделя 29-я по Пятидесятнице. Глас 4-й.
Свт. Амвросия, еп. Медиоланского (397). Прп. Нила Столобе́нского (1554). Прп. Антония Сийского (1556).
Прп. Иоанна, постника Печерского, в Ближних пещерах (XII). Мч. Афинодо́ра (ок. 304). Прп. Павла Послушли́вого. Мц. Филофе́и (XI) (Румын.).
Прмчч. Сергия Гальковского, Андроника Барсукова (1917); сщмч. Антония Попова пресвитера (1918); сщмчч. Сергия Голощапова, Михаила Успенского, Сергия Успенского пресвитеров, Никифора Литвинова диакона, прмчч. Галактиона Урбановича-Новикова и Гурия Самойлова, мч. Иоанна Демидова (1937); сщмчч. Петра Крестова и Василия Мирожина пресвитеров (1941).
Селигерской (Владимирской) иконы Божией Матери.
* В текущем году в Неделю 29-ю по Пятидесятнице читается Апостол Недели 30-й (Кол., 258 зач.), так как Апостол Недели 29-й (Кол., 257 зач.), согласно Уставу, читается в Неделю святых праотец, совпадающую в текущем году с Неделей 30-й.
** Согласно Уставу, в Неделю святых праотец на литургии положено читать Евангелие о званных на вечерю (Лк., 76 зач.), то есть рядовое Евангелие Недели 28-й. Поэтому в Неделю 29-ю по Пятидесятнице, которой в текущем году с учетом Воздвиженской отступки соответствует рядовое Евангелие Недели 28-й, следует читать Евангелие Недели 29-й (Лк., 85 зач.), которое в текущем году по расписанию рядовых евангельских чтений приходится на Неделю святых праотец.
*** Чтения прп. Нила читаются, если ему совершается служба.
Тропари и кондаки
МинеяТропа́рь, глас 4:
Пра́вило ве́ры и о́браз кро́тости,/ воздержа́ния учи́теля/ яви́ тя ста́ду твоему́/ я́же веще́й и́стина./ Сего́ ра́ди стяжа́л еси́ смире́нием высо́кая,/ нището́ю бога́тая,/ о́тче Амвро́сие,/ моли́ Христа́ Бо́га,/ спасти́ся душа́м на́шим.
Тропа́рь, глас 1:
Жела́нием духо́вным распали́вся/ и мяте́жи мирски́я отри́нув,/ ко еди́ному же Бо́гу любо́вию прилепи́лся еси́/ и, Того́ вседу́шне взыску́я,/ во вну́треннюю пусты́ню отше́л еси́, при вода́х всели́вся,/ иде́же во слеза́х и труде́х пребыва́я многоле́тное время,/ в терпе́нии мно́зем житие́ А́нгельское проходи́л еси́/ в наста́влении Боже́ственнаго ра́зума,/ и мно́жество мона́хов собра́л еси́, му́дре,/ и́хже посеща́я, и не оста́ви, Анто́ние преподо́бне, о́тче наш,/ Пресвяте́й Тро́ице моля́ся/ от зол вся́ческих изба́вити и спасти́ ду́ши на́ша.
И́кос:
Ева́нгельскаго гла́са ревни́тель блаже́нне, обре́лся еси́,/ вся бо земна́я вмени́в уме́ты,/ Христо́в после́дователь в жи́зни сей изя́щен был еси́,/ от Него́же и ра́зумом обогати́вся дарова́ний Боже́ственных,/ вразуми́ ны веща́ти тебе́ си́цевая:/ ра́дуйся, Богоно́се, Небе́сный челове́че, земны́й А́нгеле;/ ра́дуйся, чи́стый до́ме Пресвята́го Ду́ха;/ ра́дуйся, я́ко в жи́зни сей служи́тель Пресвяты́я Тро́ицы был еси́;/ ра́дуйся, я́ко моли́твами твои́ми оби́тель твою́ изба́вил еси́ невре́дну от о́гненнаго возгоре́ния;/ ра́дуйся, я́ко пусты́ню слеза́ми напои́в, многопло́дну сотвори́л еси́;/ ра́дуйся, я́ко всено́щными Боже́ственными песнопе́нии сию́ просвети́л еси́;/ ра́дуйся, я́ко в ней се́мя Боже́ственное мно́готру́дно все́ял еси́,/ его́же уплоди́ Бог во мно́го;/ ра́дуйся, я́ко в той учени́к стада́ собра́в, стра́ху Бо́жию наказа́л еси́;/ ра́дуйся, я́ко моли́твами твои́ми нечи́стии ду́си от челове́к отгони́ми быва́ют;/ ра́дуйся, я́ко непреста́нно мо́лишися Пресвяте́й Тро́ице/ о соверша́ющих благоче́стно па́мять твою́,/ е́же соблюсти́ся от враг ненаве́тным, да зове́м ти:/ ра́дуйся, Богому́дре Анто́ние, пусты́нный наста́вниче.
Тропа́рь, глас 6:
И́же вои́стинну на земли́ тя А́нгела/ и на Небеси́ челове́ка Бо́жия почти́м,/ сию́ жи́знь су́етную оста́вль,/ я́ко вои́стинну преудо́брен во́ин Христа́ Бо́га,/ на стра́сти душепа́губныя подвиза́вся в жи́зни сей су́етней/ бде́нием и поще́нием,/ во всем быв о́браз свои́м ученико́м./ Те́мже бо в тя всели́ся Пресвяты́й Дух,/ Его́же де́йствием све́тло укра́шен,/ но я́ко име́я дерзнове́ние ко Святе́й Тро́ице,/ помина́й святу́ю оби́тель сию́/ и ста́до свое́, е́же собра́, му́дре,/ и не забу́ди, я́коже обеща́ся,/ посеща́й чад свои́х,/ Анто́ние преподо́бне, о́тче наш.
Конда́к, глас 3:
Христа́ еди́наго вожделе́в,/ и к Тому́ любо́вию уязви́вся,/ и Тому́ неотло́жным путе́м после́довал еси́./ Вся́кое жите́йское наслажде́ние возненави́дев,/ те́мже, я́ко второ́е со́лнце, чудесы́ сия́я,/ и сего́ ра́ди тя да́ром обогати́ Влады́ка,/ помина́й нас, чту́щих пресве́тлую па́мять твою́, да зове́м ти:/ ра́дуйся, Анто́ние, преподо́бне о́тче наш.
И́кос:
Ева́нгельский глас разуме́в, преподо́бне,/ вся мирска́я, я́ко суету́, вмени́, хотя́ше ми́ра отреши́тися и Христу́ еди́ному сожи́тельствовати./ Те́мже Всеви́дящее Око, с высоты́ на тя на зе́млю призре́в,/ и от и́га рабо́тнаго свобожда́ет тя,/ и от того́ засвя́заннаго разрешает./ Ра́дуйся, я́ко оста́вил еси́ мир и я́же суть в ми́ре,/ до́лу влеку́щая мудрова́ния, я́ко кал, оплева́в./ Ра́дуйся, я́ко дости́же в виде́нии А́нгела Самого́ Го́спода,/ И́же крест твой вручи́в тебе́ и рек ти:/ возьми́ крест свой, гряди́ во след Мене́,/ иди́ и подвиза́йся, не убо́йся ко́зней диа́вольских,/ бу́деши муж жела́ний духо́вных./ И после́довал еси́ Христу́ неразмышле́нным по́мыслом./ Ра́дуйся, я́ко дости́же монастыря́ Пахо́миевы пу́стыни./ И та́мо кре́пце на диа́вола устреми́ся,/ о́бразом а́нгельским просве́щся,/ и отто́ле хотя́ тя Бог бо́льма чудесы́ просла́вити./ Ме́сто сие́ назна́менует, а́ки пе́рстом,/ и сотворя́ет тебе́ изы́ти из оби́тели./ Ра́дуйся, блаже́нне, бесо́вская ко́зни потреби́в поще́нием, и бде́нием, и моли́твою./ И на сем ме́сте Христа́ просла́вил еси́ и це́рковь во и́мя Святы́я Тро́ицы воздви́гнул еси́./ Ра́дуйся, я́ко запале́ние огня́ уста́вил еси́/ Боже́ственнаго хра́ма, и Святы́я Живонача́льныя Тро́ицы о́браз, из огня́ изше́дши, на ру́це тебе́ да́стся./ Ра́дуйся, я́ко от Бо́га дар прия́т исцеля́ти неду́ги и прогони́ти бе́сы о́бразом Живонача́льныя Тро́ицы./ Ра́дуйся, я́ко да́ром проро́чествия от Бо́га укра́шен/ и учени́ка своего́ Филофе́я от соблажне́ния диа́вола исхити́л еси́./ Ра́дуйся, я́ко те́ло свое́ мши́цам и пауко́м на снеде́ние дал еси́./ Ра́дуйся, я́ко отше́ствие свое́ к Бо́гу предви́дя, ученико́м свои́м предглаго́леши./ Ра́дуйся, я́ко преста́вися к Невече́рнему Све́ту и Престо́лу Святы́я Тро́ицы предстои́ши,/ Ея́же за ны непреста́нно моли́./ Ра́дуйся, я́ко и по сме́рти бе́сы прого́ниши и́менем свои́м святы́м./ Ра́дуйся, я́ко челове́ка от потопле́ния изба́вил еси́ на мо́ри с ло́диею./ Ра́дуйся, настоя́теля свое́й оби́тели игу́мена Питири́ма от боле́зни изба́вил еси́/ и к це́ркви тща́ние твори́ти повеле́л еси́./ Ра́дуйся, я́ко духоно́снаго, и преблаже́ннаго, и преподо́бнаго вели́каго Анто́ния житию́ подража́л еси́./ Ра́дуйся, я́ко блаже́ннаго и преподо́бнаго отца́ Се́ргия житию́ после́довал еси́./ Ра́дуйся, и́ноков похвала́ и утвержде́ние и моли́твенник те́плый,/ и́же оте́чество свое́ сохраня́я от враг ненаве́туемо./ Ра́дуйся, А́нгелом сопресто́льник и преподо́бным сожи́тель./ Ра́дуйся, Анто́ние, преподо́бне о́тче наш.
Тропа́рь, глас 4:
Я́ко свети́льник всесве́тел,/ яви́лся еси́ во о́строве Селиге́ра е́зера,/ преподо́бне о́тче Ни́ле,/ ты бо, крест Христо́в от ю́ности своея́ на ра́мо взем,/ усе́рдно Тому́ после́довал еси́,/ чистото́ю Бо́гови прибли́жився,/ отону́дуже и чуде́с дарова́нием обогати́лся еси́./ Тем и мы, притека́юще к ра́це моще́й твои́х, уми́льно глаго́лем:/ о́тче преподо́бне,/ моли́ Христа́ Бо́га/ спасти́ся душа́м на́шим.
Конда́к, глас 8:
Оте́чества, преподо́бне, удали́вся,/ в пусты́ню всели́лся еси́,/ и, на о́стров Селиге́ра е́зера возше́д,/ жесто́ко житие́ показа́л еси́,/ и, мно́гих доброде́тельми удиви́в,/ дарова́ния чуде́с от Христа́ прия́л еси́./ Помина́й нас, чту́щих па́мять твою́, да зове́м ти:/ ра́дуйся, Ни́ле, о́тче наш.
И́кос:
Возлюби́в, преподо́бне, Христо́вы Боже́ственныя за́поведи/ и возненави́дев ми́ра сего́ наслажде́ние,/ прите́кл еси́ усе́рдно к Тому́/ и был еси́ свети́льник, просвеща́яй концы́ блиста́нием духо́вным./ Тем, припа́дая, молю́ тя:/ просвети́ ми о́чи серде́чныя воспе́ти твоя́ по́двиги,/ поще́ние, бде́ние, сле́зы, боле́зни, изнуре́ние те́ла/ блаже́нныя ра́ди бу́дущия жи́зни,/ ея́же ны́не наслажда́яся, моли́ непреста́нно о всех нас.