Глава 33. О разрешении всего лета
Подобает ведати: яко аще случится Христова Рождества праздник, и святых Богоявлений, в среду, или пяток, разрешаем на сыр и яица: миряне же на мясо. Аще ли случится Рождество Богородицы, или Сретение, или Успение, в среду, и пяток, разрешаем на рыбу и вино. Праздник же Преображения и Введения, в кой день ни случится, разрешаем на рыбу и вино, и ядим дважды днем. Благовещение же, в кой убо день будет святаго поста до недели цветоносныя, разрешаем на рыбу и вино, ядим же единою днем, кроме субботы, и недели. В великую же неделю, аще случится до великаго четвертка, разрешаем на елей и вино. В великий же пяток, на вино точию. Праздник же Предтечев, Рождество и святых апостол Петра и Павла, и возлюбленнаго Иоанна Богослова, аще случится в среду и пяток, ядим рыбу, и пием вино, дващи днем. На Воздвижение Честнаго Креста, и на усекновение Предтечи не ядим рыбы, но елей и вино пием, и в вечер ядим без рыбы же, овощие от гроздия, или что Бог дарует от таковых. В дванадесятих же днех по Рождестве Христове, и в седмице пред Мясопустом, и седмицу светлую и седмицу 8-ю, разрешают монаси на сыр и яица, мирстии же на мясо. В седмицу же сырную, разрешают монаси и мирстии на сыр и яица. В среду же и пяток, в девятый час, единою днем. В средах же и пятцех, всея Пятьдесятницы, елей и вино, кроме среды преполовения, и среды отдания Пасхи: В та бо два дни разрешаем на рыбу и вино. Нецыи же разрешают и в прочия.
[Смотри] Подобает ведати: яко в пост святых апостол, и Христова Рождества, во вторник, и четверток, рыбы не ядим, но елей и вино точию. В понедельник, в среду и пяток ни елеа вкушаем, ни вина, но постимся до 9-го часа, и ядим в тыя дни сухоядение. В субботы же и недели, ядим рыбы. Аще случится святый во вторник, или в четверток имеяй славословие, ядим рыбу: Аще в понедельник, подобне. Аще среда и пяток, разрешаем на елей и вино точию: ядим же единою днем. Аще ли святый имеяй бдение, в среду, или пяток, разрешаем на елей и вино и рыбу. Аще ли случится память святаго, егоже есть храм, в среду, или пяток, творим подобне.
О посте Пресвятыя Богородицы подобает ведати:
В пост Святыя Владычицы нашея Богородицы Успения, 15 дней кроме Преображения Христова, постимся до 9-го часа дне: понедельник, среду и пяток, сухо ясти: и творим коленопреклонение, даже до причащения. Во вторник и четверток, варение без елеа. В субботу же и неделю, варение со елеем, и вино пием: рыбы же не ядим, до Успения Пресвятыя Богородицы: но токмо на Преображение Христово, ядим рыбу, дважды днем.
О взаконеных постех, яже соборная церковь предаде православным христианом, (святых апостол правило 69)
Аще кто епископ, или пресвитер, или диакон, или чтец или певец, святыя великия 40-цы не постится, и всякия среды и пятка всего лета, кроме немощи, да извержется, людин же да отлучится.
Сказание. Зри, яко правило святых апостолов, святую четыредесятницу, и всякую среду и пяток всего лета, равно законоположи пост, якоже во святую 40– цу ядим, такожде и в среду и пяток всего лета, кроме немощи и праздника. Глаголет бо правило: яко не постяйся в сих, священник убо извергается, мирский же отлучается от причащения на время.
Социальные медиа
Вам может быть интересно:
Типикон
Толковый Типикон – профессор Михаил Николаевич Скабалланович
Последование молебнаго пения о сущих в скорбях и различных обстояниях – святитель Афанасий (Сахаров), исповедник, епископ Ковровский
Церковный устав (типик), его образование и судьба в греческой и русской церкви – профессор Иван Данилович Мансветов
Типикон на церковнославянском языке
Первоначальный славяно-русский типикон – протоиерей Михаил Лисицын
Первоначальный славяно-русский типикон – протоиерей Михаил Лисицын
История Византийского Типикона: "Око Церковное". Часть 1. Предвизантийская эпоха
Типикон Георгия Виолакиса на церковнославянском языке
Древнейшие патриаршие Типиконы — Иерусалимский (Святогробский) и Константинопольский (Великой церкви) – профессор Алексей Афанасьевич Дмитриевский
Дополнения и поправки к книге протоиерея К. Никольского "Пособие к изучению устава Богослужения Православной Церкви"